Саратов өлкәсендә Ислам динен кабул итүгә 1100 ел тулуга әзерлек турында сөйләштеләр

Идел буе Болгары халыклары тарафыннан рәсми рәвештә Ислам динен кабул итүгә 1100 ел тулуга багышланган чираттагы төбәкара онлайн-конференция узды.

(Казан, 26 май, «Татар-информ»). Саратов өлкәсендә Идел буе Болгары халыклары тарафыннан рәсми рәвештә Ислам динен кабул итүгә 1100 ел тулуга багышланган чираттагы төбәкара онлайн-конференция узды. Бу хакта Россия Федерациясе мөселманнарының Диния нәзарәте сайтында хәбәр ителә.

Онлайн-конференциядә Мордовия, Пенза, Ульяновск, Самара, Әстерхан һәм Сарытау өлкәләреннән дин һәм җәмәгать эшлеклеләре, галимнәр катнашты.Чарада катнашучылар алда торган юбилейны лаеклы итеп билгеләп үтәргә кирәк, дигән фикергә килде. Моның өчен хәзер урыннарда төрле чаралар (фәнни-гамәли конференцияләр, мәдәни-агарту очрашулары һәм лекцияләр, спорт турнирлары, күргәзмәләр, тарихи урыннар буенча экскурсияләр һ.б.) уздыру һәм планлаштыру буенча төбәк оештыру комитетлары формалаштырыла.

Кайбер тәкъдимнәр буенча фикер алышканда, онлайн-конференциядә катнашучылар Идел буе Болгары халыклары тарафыннан Ислам динен рәсми кабул итүгә 1100 ел тулуга багышланган чараларга яшьләрне күбрәк җәлеп итәргә кирәклеген искәртте.

Төбәкара онлайн-конференция ахырында РФ Диния нәзарәте рәисе шәех Равил Гайнетдинга истәлекле юбилейны бәйрәм итү буенча үз идеяләре белән мөрәҗәгать итәргә, аның белән очрашырга һәм шуннан соң Россия төбәкләрендә билгеләнгән чараларны актив тормышка ашырырга карар кылды.

Исегезгә төшерәбез, 2022 елда Идел буе Болгары халыклары тарафыннан рәсми рәвештә Ислам динен кабул итүгә 1100 ел тулу билгеләп үтеләчәк.