Арча районының Казанка авылында яңа мәчеткә ай куелды

Хәзерге вакытта Арча районында 85 мәчет эшли.

(Казан, 23 март, «Татар-информ»). Арча районында 86 нчы гыйбадәт йорты — Казанка авылындагы мәчеткә тантаналы рәвештә ай кую тантанасы булды. Бу турыда Бөтендөнья татар конгрессы матбугат хезмәте хәбәр итте.

Тантаналы мәҗлескә Татарстан мөфтиенең мөхтәсибәтләр белән эшләү буенча киңәшчесе, Татарстанның Көньяк төбәге казые Равил хәзрәт Зөфәров килгән. Ул Татарстан мөселманнары диния назәрәте рәисе, мөфти Камил хәзрәт Сәмигуллин сәламен җиткергән, рәхмәт хатларын тапшырган.

«Арча муниципаль районы Башкарма комитеты җитәкче урынбасары Рамил Мөхетдинов һәм Бөтендөнья татар конгрессының Казан бүлеге җитәкчесе Фәрит Мифтахов үзләренең җылы сүзләрен халыкка җиткерделәр. Мәчетне салдыручыларга, биредә барлык шартларны тудыручыларга, чисталык-пөхтәлекне саклаучыларга Аллаһының рәхмәте булсын», — дип яза Рәмзия Галләметдинова.