Бүген Мәскәүдә Федерация Советы бинасында Хаҗ буенча советның чираттагы утырышы узды

“Идел-хаҗ” үзәге хаҗиларның яртысын – очкыч, чиреген – катнаш юл, чиреген коры җир транспорты белән җибәрергә планлаштыра

(Казан, 22 июль, “Татар-информ”). Бүген Мәскәүдә Федерация Советы бинасында Хаҗ буенча советның чираттагы утырышы узды. Очрашуда Россия Федерациясе төбәкләрендәге мөфтиятләр һәм мөселманнарның координация үзәкләре, дәүләт хезмәтләре һәм ведомство вәкилләре катнашты.
Очрашуда шулай ук Иран Республикасы илчелеге генераль консулы һәм Төркия Республикасының Мәскәүдәге илчесе киңәшчесе дә бар иде. Алар Россия хаҗиларына үз илләре аша узганда ярдәм күрсәтергә әзер икәнлеген белдерде.
ТР мөфтиенең хаҗ һәм гомрә буенча урынбасары, “Идел-хаҗ” төбәкара хаҗ мәркәзе генераль директоры Аяз хәзрәт Мингалиев хәбәр иткәнчә, Татарстанда быелгы хаҗга әзерлек алып барыла.
“Идел-хаҗ” үзәге хаҗиларның яртысын – очкыч, чиреген – катнаш юл, чиреген коры җир транспорты белән җибәрергә планлаштыра. Менингитка каршы вакцина Казанда җитәрлек күләмдә бар. Мәккә һәм Мәдинәдәге дүртенче категория кунакханәләр арендага алынган һәм алар өчен түләнгән.
Утырышта шулай ук Россия хаҗ миссиясе җитәкчесе итеп М.А.Гамзаев кандидатурасын билгеләү мәсьәләсе дә каралды. Бу хакта “Идел-хаҗ” төбәкара хаҗ мәркәзе матбугат хезмәте хәбәр итә.