Казанда Пасха төнендә изоляция режимын бозучылар булмаган

Гыйбадәтләр 18 апрельдән 19 апрельгә каршы төндә башкалада 41 храм һәм монастырьда узган.

(Казан, 20 апрель, «Татар-информ», Гөлнар Гарифуллина). Казанда Пасха бәйрәмендә җәмәгать тәртибен бозу, изоляцияне үтәмәү очраклары теркәлмәгән. Бу хакта Казан мэриясендә коронавирусны кисәтү буенча шәһәр штабы утырышында Россия Эчке эшләр министрлыгының Казан шәһәре буенча идарәсе башлыгы урынбасары Валерий Саматошенков әйтте.

Гыйбадәтләр 18 апрельдән 19 апрельгә каршы төндә 41 храм һәм монастырьда узган. Валерий Саматошенков җәмәгать тәртибен 100 дән артык полиция хезмәткәре контрольдә тотканын әйтте.

Коронавирус белән бәйле хәл аркасында быел православ христианнарның Пасха бәйрәмендә чиркәүләр җәмәгатьчелек өчен ябык булды.