news_header_top_970_100
16+
news_header_bot_970_100

Саба районы Явлаштау авылы мәчете 95 еллыгын бәйрәм итте

Мәчетнең 95 еллыгын бәйрәм итәргә ТР Баш казые Җәлил хәзрәт Фазлыев, район җитәкчеләре, дин әһелләре, Явлаштау авылы халкы килде.

Саба районы Явлаштау авылы мәчете 95 еллыгын бәйрәм итте
tatar-congress.org

(Казан, 18 февраль, «Татар-информ»). Саба районы Явлаштау авылы мәчетенә 95 ел тулды. Ул районда бердәнбер манарасы киселми калган иман йорты. Республикабызның «Мәдәни мираслар» исемлегенә кертелгән тарихи ядкарь булып исәпләнә. Бу хакта Бөтендөнья татар конгрессы хәбәр итә.

  • Беренче иман йорты бу авылда 1871 елда ук төзелгән була. 1924 елда көчле янгын чыгып, авылдагы 17 хуҗалык юкка чыга, ут телләре мәчетне дә читләтеп үтми. Әмма авыл халкының тырышлыгы белән мәчет торгызыла, манарага ай куела. Биредә 30нчы елларга кадәр азан тавышы өзелми. Колхозлашу чоры башлангач, дин бетерелә, авыл мулласы Габделбәр хәзрәтне дә гаиләсе белән Себергә сөргенгә озаталар. Мәчет манарасын кисәргә дип килүчеләрнең бер өлешен халык бик яхшы итеп «сыйлап», кунак итеп озата. Әмма кабат килүчеләргә инде көрәк-сәнәкләр белән каршы чыга.
  • Дин тыелган заманнарда да авылда иман бетми, авыл халкы качып посып булса да дини йолаларны башкара. Мәчет бинасы озак вакытлар клуб булып тора, аннары китапханә ролен дә үти. 1993 елда реконструкция ясалып, халыкны кабат иманга чакыра башлый.

Мәчетнең 95 еллыгын бәйрәм итәргә ТР Баш казые Җәлил хәзрәт Фазлыев, район җитәкчеләре, дин әһелләре, Явлаштау авылы халкы килде. Чарада Бөтендөнья татар конгрессы исеменнән сәламләү җиткерелде, бүләкләр тапшырылды.

autoscroll_news_right_240_400_1
autoscroll_news_right_240_400_2
news_bot_970_100