Мәскәү Җәмигъ мәчетендә коронавирустан котылу өчен тәүлек әйләнәсе Коръән укыячаклар

Мәскәү мөфтие Әлбир Крганов дин тотучыларны коронавирус йоктыру куркынычын киметү өчен мәчеткә барудан вакытлыча тыелырга чакырган иде.

(Казан, 17 март, «Татар-информ»). Россия Мөфтиләр шурасы башлыгы Равил Гайнетдиннең хәер-фатихасы белән бүген Мәскәү Җәмигъ мәчетендә тәүлек әйләнәсе Коръән аятьләрен укый башладылар. Бу хакта «Интерфакс» агентлыгы хәбәр итә.

«Россиянең төп мөселман гыйбадәтханәсендә Коръән уку гадәти хәл. Ә бу көннәрдә Изге китап аятьләрен уку дөньяда коронавирус таралуга бәйле рәвештә Аллаһы Тәгаләгә уртак мөрәҗәгатебез буларак кабул ителергә тиеш», - диелә Мөфтиләр шурасы сайтында.

Кичә Мәскәү мөфтие Әлбир Крганов дин тотучыларны коронавирус йоктыру куркынычын киметү өчен мәчеткә барудан вакытлыча тыелырга чакырган иде.