Төмән өлкәсендә Җәмигъ мәчете төзелешенә ярдәм җыялар

Мәчет бинасында ир-атлар һәм хатын-кызлар өчен гыйбадәт заллары, конференц-зал һәм Төмән өлкәсе Диния назәрәтенең Ислам мәгърифәт үзәге уку аудиторияләре булачак.

(Казан, 14 июль, «Татар-информ»). Төмән өлкәсе мөселманнарын берләштерү максатыннан төбәктә Җәмигъ мәчете төзеләчәк. Әлеге эштә теләге булган һәркем ярдәм күрсәтә ала. Бу хакта Россия Мөфтиләр шурасы сайтында хәбәр ителә.

Көнчыгыш монументаль стильдә проектлаштырылган зур комплекс «Эшчеләр бистәсе» территориясендә (Республика урамы башында) төзелә. Ул Төмән өлкәсенең иң зур мәчете була. Яңа Аллаһ йорты Себер мөселманнарының рухиятен, ата-бабаларыбызның васыятьләрен саклаучыларның бердәмлеген символлаштырачак, диелә бу хәбәрдә.

Мәчет бинасында ир-атлар һәм хатын-кызлар өчен гыйбадәт заллары, конференц-зал һәм Төмән өлкәсе Диния нәзарәтенең Ислам мәгърифәт үзәге уку аудиторияләре булачак. Мәчет төзелеше инициаторы - Төмән өлкәсе мөселманнарының Диния нәзарәте.