Лениногорскида республикакүләм «Гыйлем нуры» интеллектуаль викторина булды

Бәйге мөселманнарның гыйлем алуга мәхәббәтләрен уяту, мәхәлләләр һәм мөхтәсибәтләр арасында эшчәнлек тәҗрибәсе белән бүлешү, татар телен үстерү максатыннан үткәрелде.

(Казан, 6 апрел, «Татар-информ»). Бу көннәрдә Лениногорск шәһәренең «Ихлас» мәчетендә «Гыйлем нуры» дип аталган бәйге уздырылды. Әлеге чара Татарстан Республикасының мәчетләр каршындагы курсларында укучылар арасында оештырылды.

Бәйге мөселманнарның гыйлем алуга мәхәббәтләрен уяту, мәхәлләләр һәм мөхтәсибәтләр арасында эшчәнлек тәҗрибәсе белән бүлешү, татар телен үстерү, мөселманнарны дуслаштыру максатыннан үткәрелде. Бу турыда Татарстан мөселманнары Диния нәзарәте матбугат хезмәте хәбәр итә.

Быел бәйге 7нче тапкыр булды. Бәйгегә 11 районнан кичке дәресләрдә катнашкан дүртешәр хатын-кыз килде. Алар арасында Казаннан «Хозур» нәшрияты, Чаллы, Кукмара, Балтач, Мөслим, Чирмешән, Азнакай, Бөгелмә, Урыссу, Баулы вәкилләре бар иде. Бәйгегә хөрмәтле кунак булып Татарстанның баш казые Җәлил хәзрәт Фазлыев, Татарстанның көньяк-көнчыгыш төбәге казые Марат хәзрәт Мәрданшин һәм район мөхтәсибләре килде.

Катнашучылар фикъһе, сира, ислам тарихы буенча сорауларга җавап бирде. Беренчелекне Лениногорск төркеме яулады. Аларга грамоталар һәм затлы бүләкләр тапшырылды. Һәр катнашучыга кыйммәтле бүләкләр тапшырылды. Бәйрәм төшке аш белән тәмамланды.

Традиция буенча «Гыйлем нуры» уку сезонының төгәлләнүен символлаштыра. Шуңа бәйле рәвештә, һәр ел саен барлык мөгаллимнәргә һәм рухи остазларга рәхмәт хатлары һәм кыйммәтле бүләкләр тапшырыла. Быелгысы ел да искәрмә булмады.

Моннан тыш, Җәлил хәзрәт Фазлыев вәгазь укыды һәм катнашучыларның сорауларына җавап бирде.