Ютазыда янган мәчетне яңадан төзекләндерү өчен сүттеләр

Авыл халкы янган бүрәнәләрне сүтеп алды һәм янгыннан зыян күргән бина урынын чистартты. Мәчетнең манарасы һәм нигезе генә сакланып калды.

(Казан, 7 апрель, «Татар-информ»). Ютазы мөхтәсибәтенең Иске Каразирек авылы мәчетендә чыккан янгыннан соң бинаны һәм әйләнә-тирәне чистарту эшләре башкарылды. Бу хакта ТР Диния нәзарәте матбугат хезмәте хәбәр итә.

Авыл халкы янган бүрәнәләрне сүтеп алды һәм янгыннан зыян күргән бина урынын чистартты. Мәчетнең манарасы һәм нигезе генә сакланып калды. ТР мөселманнары Диния нәзарәтенең «Зәкят» хәйрия фонды Иске Каразирек авылы мәчетен торгызу өчен акча җыю хакында «Татар-информ» хәбәр иткән иде инде.

4 апрель көнне мәчеттә янгын чыкты. 2002 елда төзелгән агач бина җитди зыян күргән һәм тулысынча диярлек янып беткән. Мәчет ике авыл халкы өчен хезмәт иткән.