Татарстан мөфтие кылыч белән идарә итү сәнгатен күрсәтте

Камил хәзрәт Сәмигуллин киләчәктә дә хәрби практикага багышланган роликлар яздырырга вәгъдә итте.

(Казан, 5 июль, «Татар-информ»). Татарстан мөфтие Камил хәзрәт Сәмигуллин онлайн-Сабантуй уңаеннан кылыч белән идарә итү сәнгатен күрсәтте. Видеоязманы ул Instagram социаль челтәрендә үз битендә урнаштырган.

Татарстан Республикасы мөселманнары Диния нәзарәте рәисе интернетта гаилә онлайн-локацияләре: көрәш, халык уеннары, концерт программасы, милли маркет һәм башка чаралар белән оештырылган Сабантуй турында искә төшерә. «Секцияләрнең берсендә мин дә катнаштым. Татарлардагы кылыч белән идарә итү традициясе турында сөйләдем», — дигән ул.

Видеода Камил хәзрәтнең берничә яссылыкта кисү һәм каршы тору техникасын күрсәтүе күренә.

 Мөфти мондый роликларны киләчәктә дә яздырырга вәгъдә бирә. «Алга таба татар баһадирларының уктан ату үзенчәлекләре турында сөйләячәкмен», — диде ул.

Татарстанда Сабантуй кичә, 4 июльдә, онлайн-форматта узды. Чаралар трансляциясен ТНВ телеканалы һәм «Болгар» радиосы алып барды.