Түбән Кама мөхтәсибәтендә яңа мәчет ачылды

Бүгенге көндә Түбән Кама мөхтәсибәтендә 23 мәчет эшли.

(Казан, 4 октябрь, «Татар-информ»). Түбән Кама районы Трудовой бистәсендә яңа мәчет ачылды. Күптән көтеп алынган мәчет ачылышы тантанасы Түбән Кама шәһәре һәм районы имам-мөхтәсибе Салих хәзрәт Ибраһимов җитәкчелегендә узды.

Күркәм вакыйганы зурлап, бистә халкының сөенечен уртаклашырга дәрәҗәле кунаклар килде. Татарстан мөселманнары башлыгы Камил хәзрәт Сәмигуллин исеменнән барлык катнашучыларны мөфтинең мөхтәсибәтләр белән эшләү буенча урынбасары Равил хәзрәт Зөфәров сәламләде. Ул үзенең чыгышында мөселман кешесе тормышында мәчетләрнең әһәмияте турында сөйләде.

«Бик матур мәчет сафка баскан. Мәчет төзелешенә үзләренең малларын, көчләрен кертүчеләргә Аллаһының рәхмәте яусын. Игелекле эшләрегез кабул булсын!» — дип теләкләрен җиткерде ул.

Алга таба сәламләү һәм тәбрикләү сүзләре белән төрле дәрәҗәдәге җитәкчеләр чыгыш ясады. Тантана барышында мәчет төзелешендә актив катнашучылар Татарстан мөфтияте һәм Түбән Кама мөхтәсибәтенең рәхмәт хатлары белән бүләкләнде, дип хәбәр итә ТР Диния нәзарәте.

Түбән Кама районы Трудовой бистәсе мәчете имам-хатыйбы Җәмил хәзрәт Гыйльманов билгеләп узганча, мәхәллә халкы мәчет салу өчен зур тырышлык күрсәткән. 2018 елда төзелешкә рөхсәт алып, 14 июль көнне мәчеткә нигез салынды. 2021 елның 10 июлендә манара һәм ай куелды. Мәчетнең тирә-ягы төзекләндерелгән, мәчет берьюлы үзенә 50 кешене сыйдыра ала. Барлык уңайлыклары булган кухня һәм тәһарәтханә бар, инвалидлар өчен керү-чыгу урыны бар.

Кунаклар яңа мәчеттә өйлә намазы укыды һәм чәй мәҗлесендә катнашты.

  • Бүгенге көндә Түбән Кама мөхтәсибәтендә 23 мәчет эшли.