Чаллыда 25нче тапкыр Республикакүләм Коръән укучылар бәйгесе узачак

Республикакүләм Коръән укучылар бәйгесе иртәнге тугызда (09.00) «Ак мәчет»тә узачак (Яңа шәһәр, 2/14).

(Казан, 4 март, «Татар-информ»). Мәктәп балаларының язгы каникулы вакытына туры китереп, 25 март көнне, Чаллыда 25нче тапкыр традицион рәвештә Республикакүләм Коръән укучылар бәйгесе уздырылачак. Конкурсны оештыручылар булып Татарстан Республикасы мөселманнары Диния нәзарәте, Чаллы мөхтәсибәте, «Ислам нуры» дини-эшмәкәрлек үзәге һәм «Ак мәчет» мәдрәсәсе тора.

Чаллыда үтүче Коръән укучылар бәйгесе күп сандагы катнашучыларны үзенә җыя. Узган елны әлеге чарада 200ләп малай һәм кыз катнашкан иде.

Бәйгедә 15 яшькә кадәрге, Коръәнне тәҗвид илә яхшы укый белүче ир һәм кыз балалар катнаша. Ул дүрт яшь төркемендә бара: 7, 10, 13, 15 яшькә кадәр.

Балаларны Коръәнне тәҗвид кагыйдәләре буенча карап уку, Коръәнне яттан (хәтердән) тәҗвид кагыйдәләре буенча укуга һәм мәкамгә карап бәяләячәкләр. Һәр яшь төркеме буенча өчәр призлы урын билгеләнәчәк, аларга истәлекле бүләкләр һәм дипломнар тапшырылачак.

Конкурс турында тулырак мәгълүмат белән нигезләмәдә танышырга мөмкин.

Республикакүләм Коръән укучылар бәйгесе иртәнге тугызда (09.00) «Ак мәчет»тә узачак (Яңа шәһәр, 2/14).

Белешмәләр өчен телефоннар: +7 (855-25) 6-65-99; +7 (8552) 38-67-02.