Укучыларга һәм студентларга тимер юл транспортында ташламалар бирергә тәкъдим итәләр

Сенатор шәһәр яны поездларының барлык категорияләрендә укучыларга ташламалар бирүнең бердәм тәртибен билгеләү кирәклеген искәртте.

(Казан, 25 октябрь, «Татар-информ»). Федерация Советының икътисади сәясәт комитеты башлыгы Андрей Кутепов тимер юл транспортында мәктәп укучыларына һәм студентларга  ташламалар бирергә, субсидияләү системасын үзгәртергә тәкъдим итте.

РИА Новости хәбәр итүенчә, укучылар һәм студентлар өчен ташламалы билетларның гамәлдә булу срогына карата бик күп шикаятьләр килә. Россиянең төрле субъектларында ташламаларны төрлечә билгелиләр. 

Сенатор, нәтиҗәдә, шәһәр яны поездларының барлык категорияләрендә укучыларга ташламалар бирүнең бердәм тәртибен билгеләргә һәм аларның ел әйләнәсендә хәрәкәт итү мөмкинлеген карарга тәкъдим итте.

Шулай ук ул студентлар һәм мәктәп укучыларын йөртүдән югалган керемнәрне региональ бюджетларга компенсацияләү өчен федераль бюджеттан дәүләт ярдәмен, 2010-2012 еллардагы кебек, кире кайтарырга тәкъдим итте.