Кремльдә Гыйльметдинов киткәннән соң Татарстан мәнфәгатьләре йомшарыр дип уйламыйлар

РФ Дәүләт Думасында Татарстан вәкиле Илдар Гыйльметдинов Думаның Милләтләр эшләре буенча комитет җитәкчесе вазифасыннан китте.

(Казан, 23 гыйнвар, «Татар-информ», Диана Авакян). Татарстан Хөкүмәте, РФ парламентының түбән палатасында кадрлар алышынганнан соң, Дәүләт Думасында милли сәясәт өлкәсендә республика мәнфәгатьләренең йомшаруы өчен сәбәпләр күрми. ТР Президентының матбугат хезмәте җитәкчесе Лилия Галимова ТР Хөкүмәте йортында узган брифингта шул хакта хәбәр итте.

«Илдар Гыйльметдинов — бик принципиаль кеше. Аның алдында шул ук бурычлар тора. Ул биләячәк вазифаның статусы алай ук мөһим түгел. Аның дәрәҗәсе һәм тәҗрибәсе зур роль уйный. Гыйльметдиновның барлык дәрәҗәләрдә дә яхшы элемтәләре бар. Шунлыктан Дәүләт Думасында милли сәясәт белән бәйле мәсьәләләр өлкәсендә Татарстан мәнфәгатьләренең йомшаруы өчен сәбәпләр күрмибез», - диде Галимова.

Комитетны парламентарий, «Гадел Россия» фракциясе әгъзасы Олег Николаев җитәкләде. «Бердәмроссияле» Илдар Гыйльметдинов аның беренче урынбасары булды.