Равил Әхмәтшин Төркиянең Россиядәге илчесе Хөсәен Лазип Дириоз белән очрашты

Төркия илчесе әлеге вазифада 2016 елдан бирле эшләде.

(Казан, 21 декабрь, «Татар-информ»). Татарстан Республикасы Премьер-министры урынбасары — Татарстанның Россиядәге Вәкаләтле илчесе Равил Әхмәтшин, дипломатик миссиясе тәмамлану уңаеннан, Төркия Республикасының Россия Федерациясендәге Гадәттән тыш һәм тулы вәкаләтле илчесе Хөсәен Лазип Дириоз белән очрашты. Бу хакта Татарстанның Россиядәге Вәкаләтле вәкиллеге матбугат хезмәте хәбәр итә.

  • Төркия илчесе әлеге вазифада 2016 елдан бирле эшләде.

Очрашу барышында Равил Әхмәтшин Татарстан Республикасы белән сәүдә-икътисади, инвестицион һәм социаль-мәдәни элемтәләрне ныгытуда нәтиҗәле хезмәттәшлеге өчен илчегә рәхмәт белдерде.

Шунысын да искәртик: моңа кадәр Төркия Тышкы эшләр министрлыгының консул мәсьәләләре буенча департаменты җитәкчесе һәм Төркиянең Украинадагы илчесе вазифаларын башкарган Мәхмәт Самсар Төркиянең Россиядәге яңа илчесе итеп билгеләнде.