Рөстәм Миңнеханов «Айда на выборы» фотомарафонында катнашты

Татарстан Президенты үзенең хатыны белән КНИТУ-КАИның беренче бинасында урнашкан 42нче сайлау участогында тавыш бирде.

(Казан, 18 март, «Татар-информ»). Татарстан Президенты Рөстәм Миңнеханов «Айда на выборы» фотомарафонында катнашты. Республика лидеры Instagram социаль челтәрендәге үз сәхифәсендә КНИТУ-КАИның беренче бинасында урнашкан 42нче сайлау участогыннан фото урнаштырды.

«Мин үз тавышымны бирдем!» - дип язган Рөстәм Миңнеханов социаль челтәрдәге фото астына.

Бүген Татарстан Президенты хатыны Гөлсинә ханым белән бергә иртәнге 10да Карл Маркс урамында урнашкан 42нче сайлау участогында тавыш бирде.

242 сайлау участогында #айданавыборы акциясе уза. Үз тавышын бирүчеләр махсус җиһазландырылган фотозоналарда фотога төшә ала.

Фотоны #айданавыборы хештэгы белән социаль челтәрләргә урнаштырырга, үзең яшәгән шәһәр һәм сайлау участогы номерын күрсәтергә кирәк. Тавыш бирү (ул 20-25 март көннәрендә уза) үткәрелгәннән соң, җиңүчеләр ачыкланачак. Аларга айфон, велосипед һәм гидроскутерлар тапшырылачак.