Россия Дәүләт Думасы каравында Татарстанның 26 федераль закон проекты бар

Депутатлар ТАССРның 100 еллыгына багышланган республика законнары турында доклад әзерләде.

(Казан, 14 июль, «Татар-информ», Надежда Гордеева). Хәзерге вакытта Россия Дәүләт Думасы каравында республика парламенты тарафыннан тәкъдим ителгән 26 федераль закон проекты бар. Татарстан Дәүләт Советының Законлылык һәм хокук тәртибе комитеты рәисе урынбасары Александр Чубаров утырышта шул хакта хәбәр итте.

Депутат сүзләренчә, 90нчы еллардан башлап Татарстан Дәүләт Советы закон чыгару инициативалары сыйфатында Дәүләт Думасына 111 федераль канун проекты тапшырган. Шуларның унөче федераль законга әверелгән.

Чубаров шулай ук республика законнарының иҗтимагый тормышның барлык өлкәләренә кагылуын искәртте. «Татарстан зур тизлектә үсеш кичерә торган төбәк булганлыктан, бу республика законнарының төп юнәлешләрен даими рәвештә үстерүне таләп итә һәм республика парламентының әлеге өлкәдәге җаваплылыгын арттыра», - дип билгеләп үтте ул.

Комитет утырышында депутатлар ТР законнарының торышы турындагы докладны хуплады. Ул ТАССРның 100 еллыгына багышланган һәм, совет чорын (1920-1990 еллар) да кертеп, республикада законнар кабул итүнең төп этаплары турындагы мәгълүматларны, шулай ук 1990 елдан бүгенге көнгә кадәр парламентның закон чыгару эшчәнлеге нәтиҗәләрен үз эченә ала.