Сәрия Сабурская сайлауда блогерларның күзәтүен яхшы практика дип саный

Сәрия Сабурская кеше хокукын бозу өлкәсендә шикаятьләр белдерү буенча кайнар элемтәгә 130 шалтырату булуын әйтте.

(Казан, 13 сентябрь, «Татар-информ», Гөлүзә Ибраһимова). Татарстанда Кеше хокуклары буенча вәкаләтле вәкил Сәрия Сабурская фикеренчә, сайлау участокларында блогерларның күзәтүе яхшы практика. Бу хакта ул бердәм тавыш бирүнең матбугат үзәгендә сөйләде 

«Беренче тапкыр күзәтүдә блогерлар катнаша. Алар сайлау участокларын тикшереп торалар. Минемчә, ул бик әйбәт практика. Сайлаулар ачык, блогерлар мәгълүматны барлык Россия Федерациясенә тарата ала. Ул безнең сайлау комиссиясенең демократик булуы турында сөйли», — диде ул.

Сәрия Сабурская кеше хокукын бозу өлкәсендә шикаятьләр белдерү буенча кайнар элемтәгә 130 шалтырату килүен әйтте. Сораулар күбрәк сайлау процедурасын аңлатуга багышланган. «Кешеләр кайда һәм ничек сайларга кирәклеген аңлатуны сорыйлар. Үзенең сайлау участогын белмәгән кешеләр бар иде. Элек һәр сайлаучы сайлау урыны турында мәгълүмат җибәрәләр иде», — дип әйтте ул.

Сабурская әйтүенчә, ябык территорияләрдә сайлау барышын 50 кеше тикшереп тора.