Әлмәт районы башлыгы Тимур Нагуманов сайлауларны оештыру дәрәҗәсен уңай бәяләде

Һәр участокта санитар-эпидемиологик нормалар тулысынча үтәлә.

(Әлмәт, 13 сентябрь, «Татар-информ», «Әлмәт таңнары»). 13 сентябрь — Россиядә Бердәм тавыш бирү көнендә, Татарстанның Әлмәт муниципаль районы башлыгы Тимур Нагуманов сайлауларда үз тавышын бирде. 797нче сайлау участогына Тимур Дмитриевич тормыш иптәше белән килде, дип хәбәр итә almet-rt.ru.

Район башлыгы ассызыклаганча, бүген бөтен Татарстан өчен җаваплы көн: без 5 елга бер тапкыр республика Президентын сайлыйбыз.

Моннан тыш, муниципаль сайлаулар да уза. Тимур Нагуманов сайлау кампаниясенең яхшы оештырылуын билгеләп үтте. Һәр участокта санитар-эпидемиологик нормалар тулысынча үтәлә: керү юлында температураны үлчиләр, кулларны эшкәртү өчен санитайзерлар куелган һәм дезинфекция чаралары белән эшкәртелгән келәмнәр урнаштырылган, тавыш бирүчеләргә битлекләр, перчаткалар һәм ручкалар тәкъдим ителә.

Район башлыгы сүзләренә караганда, әлмәтлеләр актив тавыш бирә, нефть шәһәрендә яшәүчеләрнең яртысыннан артыгы сайлауларда үз тавышларын биргән инде.