Азнакай картлар һәм инвалидлар йортында тәрбияләнүчеләр дә сайлауда катнашты

Актүбә бистәсендә урнашкан интернатта ТР Президентын һәм бистә Советы депутатларын сайладылар.

(Казан, 13 сентябрь, «Татар-информ», «Азнакай»). Бүген Азнакайның картлар һәм инвалидлар йортында тәрбияләнүчеләр Президентын һәм бистә Советы депутатларын сайлуда катнашты. Бу хакта район басмасы яза.

Интернатта тавыш бирү күчмә сайлау комиссиясе тарафыннан югары дәрәҗәдә оештырылган иде: һәркемгә битлек, перчатка һәм ручка бирелде. 

«Бездә сайлаулар һәрчак оешкан төстә үтә. Аларның һәрберсе тормышыбызда бик зур роль уйный. Шуңа биредә яшәүче һәр кеше үз тавышының никадәр әһәмиятле һәм мөһим булуын аңлый», — ди психолог Алсу Әмирова. 

Интернатта яшәүчеләрнең барысының да фикере бер: дөньялар тыныч, күк йөзләре аяз булсын. 

«Яшәү шартларыннан бер дә зарлана алмыйбыз, бик яхшы. Торган җиребез чиста, бик тәмле итеп ашарга әзерлиләр. Республика, район, бистә җитәкчелегенең ярдәмен һәрчак тоеп яшибез», — диләр алар.