Тинчурин театры Кама Аланы атом станциясенә бәйле документаль спектакль әзерли

Кәрим Тинчурин театры быел тамашачы хозурына ике зур проект чыгарачак.

(Казан, 4 апрель, «Татар-информ»). Тинчурин театры Кама Аланында атом электр станциясе төзелеше белән бәйле документаль спектакль чыгарырга әзерләнә.

«Шартлы рәвештә „Җимерелгән хыяллар“ дип аталган бу спектакльнең иҗат төркеме май аенда Кама Аланына барачак һәм бер атна дәвамында анда яшәүчеләр белән аралашачак», — дип яза театрның матбугат хезмәте.

Бу — Кәрим Тинчурин театры быел тамашачы хозурына чыгарачак ике зур проектның берсе.

Тагын бер проект — Татарстанның халык шагыйре Мөдәррис Әгъләмовның биографиясен, эчкерсез иҗатын үз эченә алган шигъри-музыкаль спектакль. Спектакль күренекле әдипнең тууына 75 ел тулуга багышлана.

Әлеге ике проектның да режиссеры — Туфан Имаметдинов.