Кондратьев: Сентябрьдәге сайлауларда участокларда барлык санитар нормалар да үтәләчәк

13 сентябрьдә Татарстанда ТР Президентын һәм муниципаль берәмлекләрнең вәкиллекле органнары депутатларын сайлаулар узачак.

(Казан, 3 июль, «Татар-информ», Марат Ишкильдин). Татарстанда көзгә билгеләнгән сайлауларда РФ Конституциясенә төзәтмәләр буенча гомумроссия күләмендәге тавыш бирүдә каралган барлык санитар-эпидемиология нормалары да үтәләчәк. ТР Үзәк сайлау комиссиясе рәисе Андрей Кондратьев Андрей Кузьминга биргән интервьюсында шул хакта хәбәр итте.

«13 сентябрь көнне сайлауларның бөтен спектры тәкъдим ителәчәк. Бездә бу вакытта эпидемиологик вазгыять җайланыр дип өметләнәм. Үзәк сайлау комиссиясе бүген Роспотребнадзор белән бик тыгыз эшли, ике ведомство да яхшырак әзерләнергә һәм барысын да күздә тотарга кирәк дип саный», - диде Кондратьев.

Сайлау алды кампаниясе инде башланды һәм хәзер барлык кандидатлар да кирәкле документлар тәкъдим итә.

«Президент кампаниясе – республикадагы мөһим сәяси вакыйга, шул ук вакытта без тагын 7,5 мең муниципаль депутат сайлаячакбыз», - дип искәртте спикер.

Участокларда сайлаучыларның иминлегенә бәйле тулы циклның тәэмин ителүе мөһим иҗтимагый-сәяси момент булды, дип искәртте ул.