Татарстан Президенты 2020 елгы кереме турында хисап тотты

Татарстан Президенты 263,2 кв. метр мәйданлы торак йорттан һәм 414,9 кв. метр мәйданлы җир кишәрлегеннән файдалана.

(Казан, 30 апрель, «Татар-информ»).Татарстан Президенты Рөстәм Миңнеханов узган елда 8,24 миллион сум акча эшләгән, бу үткән ел белән чагыштырганда, 560 мең сумга кимрәк. Республика җитәкчесенең керемнәре турындагы декларация бүген басылып чыкты.

Татарстан Президенты 263,2 кв. метр мәйданлы торак йорттан, шулай ук 414,9 кв. метр мәйданлы җир кишәрлегеннән файдалана. Алар аның хатыны Гөлсинә ханым исеменә теркәлгән. Миңнехановның үзенең күчемсез милеге һәм транспорты юк.

Гөлсинә Миңнеханова 2020 елда 213,1 миллион сум акча эшләгән, бу 2019 ел белән чагыштырганда (480,8 млн) ике тапкыр азрак.

Декларация буенча, бу суммага милек саткан акча да кертелгән. Татарстан Президентының хатыны исемендә өч җир кишәрлеге (1 776, 414,9 һәм 363 кв. метр), 110,7 кв.метр мәйданлы кунак йорты, шулай ук 177 кв.метр мәйданлы фатир һәм машина урыны бар.