Президент Инвестицияләр һәм үсеш агентлыклары ассоциациясе башлыгы белән очрашты

Очрашуда ассоциация әгъзалары төбәк үсеш институтлары белән хезмәттәшлекне ныгыту турында фикер алыштылар.

(Казан, 27 гыйнвар, «Татар-информ»). Бүген Татарстан Республикасы Президенты Рөстәм Миңнеханов Инвестицияләр һәм үсеш агентлыклары Милли ассоциациясе идарәсе рәисе Сергей Беляков белән очрашты. Бу хакта республика җитәкчесенең матбугат хезмәте хәбәр итә.

«ТР Хөкүмәте Йортында узган очрашуда инвестицион эшчәнлекне гамәлгә ашыру өлешендә Инвестицияләр һәм үсеш агентлыклары Милли ассоциациясе әгъзалары белән хезмәттәшлекне ныгыту турында фикер алыштылар», - дип аңлаттылар матбугат хезмәтендә.

Инвестицияләр һәм үсеш агентлыкларының Милли ассоциациясе 2006 елда региональ үсеш институтларын — үсеш агентлыкларын һәм корпорацияләрен берләштерү өчен оештырылган. Аның эшчәнлеге федерация субъектларының инвестицион җәлеп итүчәнлеген арттыруга ярдәм итә торган шартлар булдыруга юнәлдерелгән.

Элегрәк «Татар-информ» хәбәр иткәнчә, ТР Инвестицион үсеш агентлыгы коллегиясенең йомгаклау утырышында «Иннополис» һәм «Алабуга» МИЗ резидентлары буенча еллык планның арттырылып үтәлеше турында сөйләделәр.