Татарстан Президенты Венгриянең Дәүләт секретаре белән очрашты

Очрашуда төбәкара хезмәттәшлекне үстерү буенча киләчәк адымнар турында фикер алыштылар.

(Казан, 26 октябрь, "Татар-информ"). Бүген Татарстан Республикасы Президенты Рөстәм Миңнеханов Венгриянең Дәүләт секретаре – илкүләм икътисад министры урынбасары Иштван Лепшени белән очрашты. Бу хакта Президентның матбугат хезмәте хәбәр итте.

Очрашу Татарстан Республикасы Хөкүмәте Йортында узды.

Татарстан Республикасы Президенты Рөстәм Миңнеханов Венгриянең Дәүләт секретаре – илкүләм икътисад министры урынбасары Иштван Лепшени төбәкара хезмәттәшлекне үстерү буенча киләчәк адымнар, сәүдә-икътисадый һәм гуманитар багланышларны үстерү, уртак проектларда катнашу мәсьәләләре турында фикер алышты.

Очрашуда Татарстан Республикасы Премьер-министры урынбасары-Татарстан Республикасы авыл хуҗалыгы һәм азык-төлек министры Марат Әхмәтов, Венгриянең Казандагы Генераль консулы Адам Штифтер, Татарстан Республикасы Инвестицион үсеш агентлыгы җитәкчесенең беренче урынбасары Инсаф Галиев, Татарстан Республикасы сәнәгать һәм сәүдә министры урынбасары Алмаз Хөсәенов катнашты.