Рөстәм Миңнеханов рәислегендә «Татнефть» җәмгыяте Директорлар советының утырышы үтте

Чарада 2017 елның 9 ае буенча бюджет йомгаклары каралды, агымдагы елның ноябренә бюджет расланды.

(Казан, 26 октябрь, «Татар-информ»). Бүген Татарстанның Хөкүмәт йортында республика Президенты Рөстәм Миңнеханов рәислегендә «Татнефть» җәмгыяте Директорлар советының чираттагы утырышы үтте. Бу хакта Татарстан Президентының матбугат хезмәте хәбәр итә.

Чарада 2017 елның 9 ае буенча бюджет йомгаклары каралды, агымдагы елның ноябренә бюджет расланды.

2018 елга «Татнефть» компаниясенең Россия социаль-икътисадый үсеш фаразларының төп параметрларын исәпкә алып эшләнелгән финанс-хуҗалык эшчәнлеге фаразлары турында мәгълүмат тыңланылды.

Шулай ук «П-Д Татнефть - Алабуга Стекловолокно» проектының киләчәк үсеш преспективалары буенча фикер алышынды. Хәзерге вакытта оешма тармакта иң эреләрдән санала һәм Россиядә җитештерелгән 32 процент продукция аңа туры килә. 2018 елда капиталь төзекләндерү барышында куәтен 31,8 мең тоннага арттыру максаты белән, пыяла кайната торган мичне яңарту планлаштырыла, бу җитештерүнең күләмен арттырачак. Проектны финанслау Россиянең Сәнәгать үсеше фонды аша дәүләт акчалары ярдәме белән планлаштырыла.

Шулай ук Директорлар советында «Татнефть» компаниясе эшчәнлегенең башка мәсьәләләре каралды.