Алексей Песошин Татарстан фермерларының авыл хуҗалыгы ярминкәсен карады

Казандагы Агропаркның ярминкә мәйданчыгына продукцияне Саба районы фермерлары, шулай ук «Татмелиорация» компаниясе бүлекчәләре алып килгән.

(Казан, 24 октябрь, «Татар-информ», Надежда Гордеева). Татарстан Премьер-министры Алексей Песошин бүген «Казан» агросәнәгать паркында авыл хуҗалыгы ярминкәсендә булды. Хөкүмәт башлыгын республиканың авыл хуҗалыгы һәм азык-төлек министры Марат Җәббаров озатып йөрде.

Песошин сәүдә рәтләрен карап чыкты, сатучылар һәм сатып алучылар белән аралашты, сәүдәнең барышы белән кызыксынды. Ул шулай ук азык-төлекнең бәяләре һәм ассортименты белән танышты. Татарстан Республикасы Хөкүмәте башлыгы авыл хуҗалыгы җитештерүчеләренең күп төрле товарлар, шул исәптән бәрәңге һәм яшелчә, ит, балык, казылык, сыр, он, ярмалар, бал, май, йомырка, сөт продуктлары, шикәр комы һәм башка әйберләр тәкъдим итүен күрде.

Премьер-министрга «Казан» агросәнәгать паркы мәйданчыгына Саба районы фермерлары, шулай ук «Татмелиорация» компаниясенең 42 бүлекчәсе үз продукциясен китерүләрен хәбәр иттеләр.

«Татмелиорация» генераль директоры Рөстәм Сөнгатуллин шәһәр халкының яшелчә һәм иткә аеруча ихтыяҗы зур булуын сөйләде.

Быел Татарстанда традицион көзге авыл хуҗалыгы ярминкәләре 12 сентябрьдә ачылды һәм һәр шимбә көнне уза. Аларның эше яңа елга кадәр дәвам итәчәк.