Владимир Путин Чаллыга килде

Россия Хөкүмәте башлыгы Чаллының төп предприятиесе – “КАМАЗ”да булды

(Чаллы, 19 декабрь, “Татар-информ”, Михаил Миронов). Бүген Россия Хөкүмәте башлыгы Владимир Путин Чаллыга килде. Премьер-министрның шәһәргә ясаган эш сәфәренең төп максаты – “КАМАЗ”да кризис шартларында килеп туган проблемалар хакында фикер алышу һәм заводка ярдәм итү чараларын карау.
Владимир Путин “КАМАЗ”ның Фәнни-техник үзәгендә булды. Аны Татарстан Президенты Минтимер Шәймиев һәм предприятиенең генераль директоры Сергей Когогин озатып йөрде. Фәнни-техник үзәктә Премьер-министрга предприятиенең перспектив модельләрен, шул исәптән артиллерия тягачларын һәм хәтта “КАМАЗ” базасындагы бронемашиналарны күрсәттеләр.
Хөкүмәт башлыгы шулай ук двигатель, шассиларның эксперименталь эшләнмәләре белән дә танышты. Владимир Путин Фәнни-техник үзәк хезмәткәрләренең эш шартлары белән кызыксынды һәм аларның икесен дирекциягә киңәшмәгә чакырды.
Бу минутларда “КАМАЗ” дирекциясендә киңәшмә бара, анда предприятиегә ярдәм күрсәтү чаралары хакында фикер алышалар.