Татарстанда яңа төзелеш министры билгеләнде
Марат Айзатуллин җитәкчелегендә Татарстанда медицина, белем бирү һәм мәдәният оешмаларына масштаблы реконструкция уздырылды.
(Казан, 5 октябрь, «Татар-информ»). Татарстан Республикасының Инвестицион-төзелеш баш идарәсенең элекке җитәкчесе Марат Айзатуллин Татарстанның Төзелеш, архитектура һәм торак-коммуналь хуҗалыгы министры итеп билгеләнде. Бу хакта «Татар-информ» га республика Хөкүмәтендәге үз чыганагы хәбәр итте.
«Бүген Марат Айзатуллинны җитәкче буларак, министрлык хезмәткәрләренә тәкъдим итәләр», — диде агентлык әңгәмәдәше.
Марат Мансур улы Айзатуллин 2013 елдан Татарстанның Инвестицион-төзелеш баш идарәсе, 2014 елда Татарстан Торак-коммуналь хуҗалык фонды башлыгы булды. Аның җитәкчелегендә республикада медицина, белем бирү һәм мәдәният оешмаларына масштаблы реконструкция уздырылды.
Марат Айзатуллин Татарстанның Транспорт һәм юл хуҗалыгы, Россиянең Транспорт министрлыкларының һәм Россия Президентының мактау грамотасы белән бүләкләнгән. «2010 елда Бөтенроссия халык санын алуны уздырудагы казанышлары өчен» медаленә ия.