Рөстәм Миңнеханов Үзбәкстанның Инновацион үсеш министры белән очрашты

«Безнең күп кенә проектлар чит ил партнерлары белән хезмәттәшлектә гамәлгә ашырыла. Безгә шулай ук инновацион үсеш өлкәсендә кооперацияне активлаштырырга кирәк», — ди Татарстан Президенты.

(Казан, 15 сентябрь, «Татар-информ»). Бүген Татарстан Республикасы Президенты Рөстәм Миңнеханов Үзбәкстан Республикасының Инновацион үсеш министры Ибраһим Абдерахманов белән очрашты. Очрашу Казан Кремлендә узды.

Татарстан Президентының матбугат хезмәте хәбәр иткәнчә, Казанга визиты кысаларында Ибраһим Абдерахманов TCI-2021 24 нче глобаль конференциясе эшендә катнашачак, «Химград» технополисында, КФУда һәм Иннополис ИТ-шәһәрендә булачак.

Рөстәм Миңнеханов билгеләп үткәнчә, Татарстан һәм Үзбәкстанның инновацион үсеш өлкәсендә хезмәттәшлекне үстерү өчен яхшы мөмкинлекләре бар. Ул ассызыклаганча, Татарстан — Россиянең икътисади яктан үсеш алган, тотрыклы һәм инновацион регионнарының берсе. Мәгълүмати технологияләрне үстерүгә аерым игътибар бирелә.

Республиканың инновацион инфраструктурасы, Рөстәм Миңнеханов сүзләренчә, «Химград» технополисы, технопарклар челтәре, индустриаль парклар, алгарышлы социаль-икътисади үсеш территорияләре һәм Татарстан Республикасы Нанотехнологияләр үзәге тарафыннан тәкъдим ителгән.

«Безнең күп кенә проектлар чит ил партнерлары белән хезмәттәшлектә гамәлгә ашырыла. Безгә шулай ук инновацион үсеш өлкәсендә кооперацияне активлаштырырга кирәк», — дип өстәде Рөстәм Миңнеханов.