Песошин: Кешеләрнең битлек кию режимын үтәүләре катгый контрольдә тотылачак

12 майдан Татарстан халкына өйдән чыгу өчен СМС-пропуск алырга кирәкми, әмма сәүдә урыннарында һәм җәмәгать транспортында шәхси саклану чараларын куллану кирәк.

(Казан, 12 май, «Татар-информ»). Татарстанда гражданнарның битлек кию режимын үтәве катгый контрольдә тотылачак. Бүген бу хакта Татарстан Республикасы Хөкүмәте Йортында узган республика киңәшмәсендә Татарстан Премьер-министры Алексей Песошин хәбәр итте.

Киңәшмә Татарстан Республикасының барлык районнары, республика министрлыклары һәм ведомстволары белән видеоконференция режимында узды һәм ул санитар-эпидемиологик хәлгә багышланган иде.

Алексей Песошин Татарстанда 2020 елның 10 маенда кабул ителгән 370 номерлы карар үз көченә керүен, аның нигезендә республика халкына өйдән чыгу өчен СМС-пропуск алырга кирәкмәвен искәртте. Әмма гражданнар сәүдә урыннарында, җәмәгать транспортында һәм башка җирдә битлек һәм перчаткалар киеп йөрергә тиеш.

Безнең бурыч — икътисадка ярдәм итү, ихтыяҗны тәэмин итү һәм акрынлап нормаль тормыш тәэмин ителешенә күчү, дип искәртте Алексей Песошин. Аның сүзләренә караганда, кешеләрнең битлек кию режимын үтәве мобиль төркемнәр тарафыннан контрольдә тотылачак, анда полиция һәм Росгвардия хезмәткәрләре, шулай ук җирле хакимият дәрәҗәсендә башкарма комитет вәкилләре керәчәк.

«Мин битлек һәм перчаткалар киеп йөрим, сезне дә, хезмәттәшләрем, шуңа чакырам. Сез бу кагыйдәләрне урыннарда үтәүнең беренче үрнәге!» — диде Премьер-министр.

Ике көннән соң тагын бер киңәшмә узачак. Анда төбәк шәһәрләрендә һәм районнарында битлек кию режимын үтәү нәтиҗәләре буенча фикер алышачаклар, дип хәбәр итә ТР Хөкүмәте матбугат хезмәте.