Рөстәм Миңнеханов Татарстан шәһәрләрендә патрульлек итүне көчәйтергә кушты
Оператив штабның кайнар элемтәсенә республикада яшәүчеләрдән күпсанлы шалтыратулар килә. Аларны махсус санитар-эпидемиологик режим чорында урамнарда кешеләрнең күп булуы борчый.
(Казан, 10 апрель, «Татар-информ»). Татарстан Президенты Рөстәм Миңнеханов, изоляция режимын бозучы кешеләрне ачыклау өчен, Татарстан шәһәрләрендә патрульлек итүне көчәйтергә кушты. Бу хакта ТР Президентының матбугат хезмәте җитәкчесе Лилия Галимова хәбәр итте.
«Оператив штабның кайнар элемтәсенә республикада яшәүчеләрдән күпсанлы шалтыратулар килә. Аларны махсус санитар-эпидемиологик режим чорында урамнарда кешеләрнең күп булуы борчый. Үз сәламәтлекләре өчен куркып, алар тиешле чаралар күрүне сорый. Шуңа бәйле рәвештә, республика Президенты бүгенге көннән тиешле хезмәтләр тарафыннан шәһәрләрдә патрульлек итүне көчәйтергә кушты», - дип искәртте Лилия Галимова.
«Татар-информ» агентлыгы Рөстәм Миңнехановның изоляция режимын бозучыларны штрафка тарту хокукы булган затлар даирәсен киңәйтүе хакында хәбәр иткән иде инде.