Казанда 45 меңлек “Рубин” 2012 ел ахырына тапшырылачак

ТР Премьер-министры Илдар Халиков 2013 елда булачак Универсиадага дип бүген төзелә торган спорт объектларын һәм юл аермаларын карап йөрде

(Казан, 3 гыйнвар, “Татар-информ”, Кристина Иванова). Казанның әлегә “Рубин” дип йөртелгән 45 мең тамашачы утыртырга сәләтле футбол стадионы 2012 ел ахырында кулланылышка тапшыру планлаштырылган.

Бу хакта бүген, 2013 елда Казанда булачак Универсиадага дип төзелә торган спорт объектларын һәм юл аермаларын карап чыкканнан соң, журналистлар белән булган әңгәмәләшү барышында ТР төзелеш, архитектура һәм торак-коммуналь хуҗалык министры Ирек Фәйзуллин хәбәр итте. Үткәреләчәк бөтендөнья спорт уеннарындагы эш темпларын ТР Премьер-министры Илдар Халиков та бәяләде. Аерым алганда, бүген Татарстан түрәләре төзелеп килә торган Универсиада авылы, Кабандагы көймәдә ишкәкләр белән ишү каналы, 45 мең кешелек футбол стадионы, транспорт өчен юл аермалары кебек объектларны күздән кичерде.

Министр искәрткәнчә, Универсиада ачылышы һәм ябылышы тантаналары да шушы стадионда барачак, футбол буенча 2018 елдагы дөнья чемпионатының төркем этаплары матчлары да, чирек яки ярым финал булырга бик мөмкин, - аның базасында. ФИФА таләпләре буенча, дөнья чемпионатының чирек финалын уздыру өчен стадионның кимендә 45 мең кеше сыйдырышлы булуы шарт, ярым финал өчен - 60 мең. “Универсиада-2013” дирекциясе башлыгы Владимир Леонов сүзләренчә, 60 мең кеше сыйдырышлы итү өчен, футбол стадионы проектына үзгәрешләр кертелергә мөмкин. Ләкин И.Фәйзуллин моны ярашлы дип санамый. “Гаять зур стадион салу гына түгел, аны алга таба эксплуатацияләү мәсьәләсе дә бар, 60 мең урынлы стадион безнең башкала өчен артык зур”, - дигән фикердә министр.

Стадионда бүген җәелдерелгән эш темплары турында И.Фәйзуллин: “Тагын 800 свай-багана кагасы, трибуналарына 110 мең куб.м бетон, ростверкларына 11 мең куб.м бетон саласы бар, 15 мең тоннага якын металл стадион өслекләренә китә. Хәзерге вакытта 18 мең свай кагылган, һава торышы шартларына бәйле кыенлыкларга карамастан, эш әлегә график буенча бара”, - диде.

Аның сүзләренчә, Универсиадага дигән 30 спорт объектының 5сен генә саласы калды, футбол стдаионы 2012 ел ахырына кулланылышка тапшырылса, ишкәкләрдә ишү каналы – киләсе елның июненә, Универсиада авылының калган төзелешләре – быел сентябрьда. Шулай ук юл аермалары төзү эшләре дә график буенча бара. Әмирхан – Чистай урамнары юл аермасы салына башлый, Ямашев, Әмирхан, Чистай урамнарында транспорт хәрәкәте өчен кыенлыклар ярты елга сузылачак, дип белдерде министр И.Фәйзуллин.