Минзәлә районы хуҗалыкларының ындыр табакларына 17455 тоннадан артык ашлык кайтарылды
Минзәлә районы авыл хуҗалыгы һәм азык-төлек идарәсенең оператив мәгълүматларыннан күренгәнчә, 5 августка барлыгы борчак 935, көзге бодай 12042, арпа 778 гектар мәйданда суктырып алынган. Барлыгы 17455,8 тонна ашлык амбарларга кайтарылды.
Уракта «Калморза» хуҗалыгының 8 комбайнчысы да район комбайнчылары арасында иң алдынгылар. Аларның һәрберсенең эш күрсәткече – 600 тоннадан артык. Бу хакта «Минзәлә-информ» хәбәр итә.
«Калморза» хуҗалыгы 423, «Мензелинские зори» агрофирмасының Кадрәк җитештерү комплексы 400 гектарда борчак сугуны төгәлләде. «Клешевников» КФХсы борчак суктыруга керешмәде. «Август» компаниясенә караган Мензелинское ОСП игенчеләре 350 гектарда көзге бодай суктырды һәм гектар күәте 67,7 центнер тәшкил итә. Район кырларында 46 комбайн эшләде.