Мәдәният 25 апрель 2005 12:46

Казандагы 20нче санлы китапханәгә 35 ел тула

Скопировать ссылку

(Казан, 25 апрель, «Татар-информ», Дания Моисеева). Казан шәһәренең 20нче санлы китапханәсе бу көннәрдә үзенең 35 еллыгын билгеләп үтә. Язучылар берлеге бинасы каршындагы китапханә яшь каләм ияләрен дә үзенә ияләштергән.

Биредә һәр якшәмбе саен шагыйрә Наилә Ахунова җитәкчелегендәге «Ак карга» («Белая ворона») исемле әдәби клуб әгъзалары җыела. Китапханәдәге пианино да еш яңгырый. Чөнки Любовь Ложкина җитәкчелегендәге китапханә хезмәткәрләре бик кунакчыл. Китап сөючеләрдән тыш монда әдипләр һәм сәнгать осталары белән дә очрашулар оештырыла. Китапханәдә язучылардан Мөсәгыйть Хәбибуллин, Равил Бохараев һәм Салават Юзеевнең дә кунакта булганы бар. Мәскәүдән һәм Россиянең башка шәһәрләреннән дә бирегә кунаклар килгәли. Мәсәлән, быел «Октябрь» журналы хезмәткәре Илдар Әбүзәров та монда булып китте.

Китапханәдә татар әдәбиятына багышланган зал да бар. Аның бер почмагында татар язучысы Гариф Ахуновның юбилее уңаеннан аңа багышланган күргәзмә урын алган. Бәләкәй генә бу китапханә шушы тирәдә яшәүчеләр өчен үзенчәлекле мәдәният учагы булып тора.

Кызыклы тарихлы бу китапханә Мөштәри урамында, тарихи һәйкәл булган йортта урнашкан. Биредә 1887нче елда В.Ульяновны университет сходкасыннан соң кулга алулары хакында язылган мемориал такта эленгән.

Сәхифәләр

Казандагы 20нче санлы китапханәгә 35 ел тула