Казанның Дәрвишләр бистәсендә кызны кыйнаган видеодан соң тикшерү үткәрелә

Тикшерүчеләр бу вакыйганың барлык шартларын ачыкларга ниятли.

(Казан, 28 август, «Татар-информ»). Казанда Дәрвишләр бистәсендә бер кызны кыйнаган видео чыкканнан соң тикшерү бара. Бу хакта Россия Тикшерү комитетының Татарстан буенча Тикшерү идарәсе җитәкчесе өлкән ярдәмчесе Андрей Шептицкий хәбәр итте.

«Социаль челтәрләргә мониторинг барышында Дәрвишләр бистәсендәге ишегалларының берсендә бер кызның икенче бер яшүсмер кызны кыйнавы төшерелгән ролик ачыкланды. Әлеге факт буенча тикшерү башланды», - диде Шептицкий.

Хокук сакчылары бу вакыйганың барлык шартларын ачыклау өчен чаралар үткәрә. Тикшерү нәтиҗәләре буенча тиешле процессуаль карар кабул ителәчәк.