Казанда тыелган урында юл аркылы чыккан ирне трамвай бәрдергән

Фаҗига кичә кич Ямашев проспектында 67б номерлы йорт каршында булган.

(Казан, 27 март, «Татар-информ», Полина Шевчук). Казанда трамвай тыелган урында юл аркылы чыгарга карар иткән ирне бәрдергән, ир-ат урында ук үлгән. Бу хакта «Татар-информ»га шәһәр автоинспекциясендә сөйләделәр.

Кичә 21.45 сәгатьтә Ямашев проспектында 67б номерлы йорт каршында трамвай 56 яшьлек ир-атны бәрдергән. Башлангыч мәгълүматлар буенча, ир-ат, янәшәдә генә җәяүлеләр өчен җир асты кичүе булса да, юлны җәяүлеләр өчен билгеләнмәгән урыннан чыгарга уйлаган.

«Юл-транспорт һәлакәте нәтиҗәсендә җәяүле алган җәрәхәтләрдән фаҗига урынында вафат булган», - диделәр ЮХИДИдә.