Татарстанның Ютазы районында корыч төялгән тепловозга ут капкан

Бөгелмәдән килүче состав Кәрәкәшле авылы янында яна башлаган.

(Казан, 24 август, «Татар-информ»). Татарстанның Ютазы районында корыч төялгән тепловозга ут капкан. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

Бүген төнлә 112 бердәм номерына Кәрәкәшле авылы янында Бөгелмәдән Кандра Күлгә таба хәрәкәт итүче составка ут кабуы хакында хәбәр килгән.

Бөгелмә шәһәре янгын сүндерүчеләре утка җәелергә ирек бирмәгән. Янгынның мәйданы 8 квадрат метр тәшкил иткән.

Хәзер белгечләр составка ни сәбәпле ут кабуын ачыклый.