Арча районында котырган төлкеләр ташлана

Төлкеләр арканда торган терлекне корбаны итә

 (Казан, 24 август, “Татар-информ”). Соңгы көннәрдә Арча районының төрле почмакларыннан котырган төлкеләрнең йорт хайваннарына ташлануы турында хәбәрләр еш килә башлады. Мәсәлән, Наласа авылының бер урамында гына да мондый өч очрак теркәлде инде.

Төлке көпә–көндез бакча башында арканда торган сыерга ташланган. Бу юлы төлкенең үзен дә юк итәргә өлгерделәр. Сыерга ветеринария берләшмәсеннән килеп вакцина кададылар. Авыл халкы шуның белән тынычландык дип торганда, иртән тагын бер котырган төлке аркандагы терлекләргә зыян китергән дигән хәбәр килеп иреште, дип яза “Арча хәбәрләре” басмасы.