Югары Ослан районында ике машина бәрелешеп, 4 кеше зыян күргән

Трассада ике «Лада Калина» бәрелешкән.

(Казан, 24 февраль, «Татар-информ) Югары Ослан районында ике машина бәрелешү нәтиҗәсендә 4 кеше зыян күргән. Бу хакта «Татар-информ» мәгълүмат агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

Һәлакәт бүген Казан — Кайбыч трассасының 2нче километрында Коргыҗа авылы янәшәсендә 7 сәгать 25 минутта булган. Ике «Лада Калина» бәрелешү аркасында 4 кеше зыян күргән.

Рус Макулово авылыннан янгын-коткару посты хезмәткәрләре зыян күрүчеләргә беренче ярдәм күрсәткән, янып китмәсен өчен ике машинаның да аккумуляторларын сүндергән, аннан юлны бәрелешүдән килеп чыккан машина ватыкларыннан чистарткан .