Мамадышта кунакханә түбәсенә ут капкан, биредә яшәүчеләрне эвакуацияләгәннәр

Янгынның мәйданы 200 квадрат метр тәшкил иткән, беркем дә зыян күрмәгән.

(Казан, 22 апрель, «Татар-информ»). Мамадыш шәһәренең «Апрель» кунакханәсендә янгын иртән иртүк башланган. 101 янгын сагы номерына 4.33 сәгатьтә шул хакта хәбәр иткәннәр.

Россия Гадәттән тыш хәлләр министрлыгының ТР буенча Баш идарәсе матбугат хезмәтеннән «Татар-информ» агентлыгына хәбәр итүләренчә, ут белән көрәшүчеләр урынга килгәндә, өч катлы бинаның түбәсен янгын чолгап алган була инде. Янгынның мәйданы 200 квадрат метр тәшкил иткән.

Кунакханәдә яшәүче 22 кеше һәм ике хезмәткәр янгын сүндерүчеләр килгәнче үк үзләре бинадан чыгып өлгергән. Беркем дә зыян күрмәгән.