Түбән Кама районында юл кырыена төшеп киткән “сигезле” машинасы йөртүчесе һәлак булган

Юл-транспорт һәлакәте Түбән Кама – Прости юлының беренче километрында килеп чыккан.

(Казан, 20 май, “Татар-информ”). Түбән Кама районында юл кырыена төшеп киткән “сигезле” машинасын йөртүче һәлак булган. Бу хакта Россия Эчке эшләр министрлыгының Татарстан буенча матбугат хезмәте хәбәр итә.

Бүген иртән юл-транспорт һәлакәте Түбән Кама – Прости юлының беренче километрында килеп чыккан. 55 яшьлек “сигезле” йөртүчесе, тизлекне арттырып, каршы як хәрәкәт юлына чыккан һәм юл кырыена әйләнеп төшеп киткән.

Юл-транспорт һәлакәтендә машина йөртүче урында ук үлгән. 27 яшьлек пассажирын сыдырылулар, имгәнүләр  белән хастаханәгә озатканнар.