Париждагы терактлар вакытында россияле һәлак булган

Аның мәетен ире таныган

(Казан, 18 ноябрь, «Татар-информ»). Россия Тышкы эшләр министрлыгында Париждагы терактлар вакытында һәлак булган россияле Наталья Муравьеваны тануларын раслыйлар. Бу хакта "Интерфакс" хәбәр итә.

"Без һәлак булган хатын-кызны ире тануын раслыйбыз", - дигәннәр РФ Тышкы эшләр министрлыгында.

РФның Париждагы илчелегендә хәбәр итүләренчә, кичә "җирле вакыт белән 18.50дә Муравьеваның ире аның мәетен таныган".

Шул рәвешле, хәзергә Муравьева 13 ноябрь көнне Парижда кылынган террорчылык актлары вакытында үлгән бердәнбер Россия гражданы булды.