Биш кеше Салмачыда һәм Көектә дәүләтнеке булган 32 җир участогын урлаган

Ир-атлар ялган документлар белән җирне үзләренә рәсмиләштереп, саткан.

(Казан, 18 июль, “Татар-информ”). Биш Казан кешесе Салмачыда һәм Көектә дәүләтнеке булган 32 җир участогын урлаган. Бу хакта “Татар-информ” агентлыгына Татарстан Республикасы прокурорының өлкән ярдәмчесе Руслан Галиев хәбәр итә.

2010 елда Казанда яшәүче 5 ир-ат ялган бизнес оештырган. Алар ялган документлар буенча Салмачыда һәм Көектәге җир участокларын үзләренә рәсмиләштереп, шуннан соң ялган затлар исеменә күчереп, сатканнар.

Ялган бизнесменнар 3 елд дәвамында дәүләтнеке булган 32 җир участогын урлаган. Шуларның бер өлешен уңышлы сатканнар. Ир-атлар китергән зыян 40 млн сумнан арткан.

Шикләнелә торган затлар үз гаепләрен өлешчә таныган. Аларны өй арестына алганнар, ә җир участокларына арест салганнар.