Мари Элда юл һәлакәтендә зыян күргән кызны Казанга алып кайттылар

Гражданнар оборонасы һәм гадәттән тыш хәлләр министрлыгы борты Казанга алып кайткан кыз авыр хәлдә, ул ясалма сулыш алу аппаратына тоташтырылган.

(Казан, 17 ноябрь, «Татар-информ», Валерия Белова). Татарстан Гражданнар оборонасы һәм гадәттән тыш хәлләр министрлыгы бортында Мари Эл юл һәлакәтендә зыян күргән кыз Казанга кайтарылды, дип хәбәр итте “Татар-информ” мәгълүмат агентлыгына ТР Сәламәтлек саклау министрлыгы матбугат секретаре.

“Татар-информ” агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр итүләренчә, вертолет 17.10 сәгатьтә Республика клиник хастаханәсе мәйданчыгына төшкән. Зыян күргән кызны реанимобильдә Казанның Балалар республика клиник хастаханәсенә илткәннәр.

“Казан белгечләре 14 яшьлек кызны Ми-8 вертолеты бортында Йошкар-Ола хастаханәсеннән  алды. Кызны алырга Республика клиник хастаханәсе реаниматологы һәм  Катастрофалар медицинасы үзәгенең ике хезмәткәре барды” , - дип белдерде ТР Сәламәтлек саклау министрлыгы матбугат секретаре Айгөл Сәлимҗанова.

Казанга алып кайткан кыз авыр хәлдә, ул ясалма сулыш алу аппаратына тоташтырылган.