Алты машина бәрелешкәннән соң, Казанда берничә чакрымлы бөке барлыкка килгән

(Казан, 17 сентябрь, «Татар-информ»). Массакүләм юл-транспорт һәлакәтеннән соң, Казанның Горький шоссесында бөке хасил булган. «Яндекс.Пробки» порталы мәгълүматы буенча машиналар шәһәр ягына таба 15 км/сәг тизлек белән хәрәкәт итәләр.

«Бүген 7.00 сәгать тирәсендә Горький шоссесында берьюлы алты машина («КИА», «Рено», «Фольксваген», «Фиат», «Опель» һәм «Хендэ») бәрелешкән. Һәлакәт аркасында зыян күрүчеләр юк», – дип сөйләделәр Казанның Дәүләт автоинспекциясендә.

Һәлакәт урынында төшерелгән видео социаль челтәрләрдә чыкты. Анда юлда берьюлы берничә автомобиль бәрелешкәнлеге күренә. Юл-транспорт һәлакәте аркасында җиңел машиналарның берсе юлны бүлеп куйган коймага бәрелгән.

Хәзер машина йөртүчеләргә озак вакыт бөкедә утырырга туры киләчәк.