Төнлә Казанда җиңел машина янган

Юл-транспорт һәлакәте Мамадыш трактында Зур Клыки бистәсендә булган.

(Казан, 17 май, «Татар-информ»). Узган төндә Казанда җиңел машина янган. Бу хакта «Татар-информ»га ТР буенча Россия Гадәттән тыш хәлләр министрлыгы Баш идарәсенең матбугат хезмәтендә хәбәр иттеләр.

Бүген иртәнге сәгать дүрттә Казанның Зур Клыки бистәсендә Октябрьский урамында унбишенче модель «Лада» автомобиле янган.

Янгын сүндерүчеләр утны 3 минут эчендә сүндергән. Машинаның 22 яшьлек йөртүчесе янгында зыян күрмәгән.

Машина тулысынча янып беткән.