Казан кызы үзенә бәйләнгән танышына 27 тапкыр пычак белән чәнчегән

Канга баткан ир-атны күршеләре тапкан, аны ашыгыч ярдәм машинасы алып киткән.

(Казан, 15 май, «Татар-информ»). Казан кызы үзенә бәйләнгән танышына 27 тапкыр пычак белән чәнчегән. Бу турыда Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

Ачыкланганча, Октябрь урамындагы йортларның берсендә, фатирда Казанда яшәүче 18 яшьлек кыз бергә торучы ир-ат һәм өч танышы белән бергә спиртлы эчемлекләр эчкән. Барысы да йокларга яткан. Әмма 44 яшьлек ир-ат кызга бәйләнә башлаган. Кыз аны подъездга алып чыккан һәм баскычтан этеп төшергән. Аннары кыз фатирдан пычак алып чыгып, ир-атка 27 тапкыр чәнчегән.

Канга баткан ир-атны күршеләре тапкан һәм 112 номерына шалтыраткан. Яралы ир-атны ашыгыч ярдәм машинасында хастаханәгә алып киткәннәр.

«Үтерергә омтылу» маддәсе буенча җинаять эше кузгатылган.