Алексеевскида салкында өшегән баланың апасын да Казан хастаханәсенә алып киләләр
Кызның бармакларына зыян килгән, хәле уртача авырлыкта.
(Казан, 13 гыйнвар, «Татар-информ», Эвелина Киселёва). Алексеевск районында салкында өшегән баланың дүрт яшьлек апасын да Республика балалар клиник хастаханәсенә алып киләләр. Биредә табиблар өшегән малайны коткара. Бу турыда «Татар-информ» агентлыгына клиника матбугат хезмәтендә хәбәр иттеләр.
«Икенче баланың хәле тотрыклы», — дип ачыклык керттеләр Республика балалар клиник хастаханәсендә. Аңа кадәр кыз бала Алексеевск үзәк район хастаханәсендә иде. Кызның бармакларына зыян килгән, хәле уртача авырлыкта.
Клиникада сөйләүләренчә, салкында өшегән бер яшьлек баланы Республика балалар клиник хастаханәсенә китергәннәр инде. Ул реанимациядә, хәзер табиблар баланың сәламәтлеге өчен мөмкин булганның барысын да эшли.
Алексеевск районында ике бала салкында өшегәннән соң, прокуратура тикшерү башлаган.
Татарстанда бер яшьлек бала салкында өшегән, ул бик авыр хәлдә, дип язган идек.