Татарстанда тагын өч кеше коронавирустан вафат булган

Covid-19 пандемиясе башланганнан бирле республикада 438 кешесе үлгән.

(Казан, 12 апрель, «Татар-информ»). Татарстанда тагын өч кеше — ике хатын-кыз һәм бер ир-ат коронавирус инфекциясе корбаны булды. Бу хакта ТР Сәламәтлек саклау министрлыгының матбугат хезмәте хәбәр итә.

Covid-19дан 1936 һәм 1940 елларда туган хатын-кызлар, шулай ук 1936 елда туган ир-ат вафат булды, дип аңлаттылар министрлыкта.

«Үлем сәбәпләре патологоанатомик экспертиза нәтиҗәсендә билгеләнгән. Вирус идентификацияләнгән», — дип билгеләп үттеләр республика ведомствосының матбугат хезмәтендә.

2021 елның 11 апреленә алынган мәгълүматларга караганда, пандемия башланганнан бирле Татарстанда коронавирустан 438 үлем очрагы рәсми рәвештә теркәлгән.